تحت ولاية حكم عبدالله الوالد

أبيآت تتكلم عن نفسهـها

متواضعه جدا لوالدي خـآدم الحرمين

الملك / عبدالله حفظه الله ورعاه وامد في عمره بالصحه العافيه

،’

،’

يا فخر قاف القصيد وطنخة الشاعر
لا قال فيك القصايد وش يسميها

تخونه المقدره ويخون به عرفه
وتموت فيك الحروف ولا نوفيها

لو إن حمل القصيده فوق ما يقدر
لكن رب الملا ما يخذله فيها

اليوم فيك المشاعر تنتخي واجب
وتقوم لك فالطلب لا صرت واليها

أنا إليا جيت بفخر ما أفتخر بآية
واحد يشابه الأوادم في اساميها

ما أسوق ذود الجزاله كود في وقته
ولا درهمت في قبالك من يساويها

هذي غناة القصيد ولذة حروفه
وهذي مكاسب حظيظن مجتهد فيها

وأنا بك أفخر وأماري والحكم لله
ومن بعد ربي عليك أثني وأثنيها

سلآم يا فخر الأمه يا بعد رآسي
يا بهجة النفس نفسي لك مفديها

سلام يا فخر كل الأرض والعالم
يا هامة شيوخ نجد وذي مواريها

وسـلآم يالحاكم اللي ما لفى زيك
هدية من عطى الرحمن مهديها

عزالله إنه عطانا بك ووفقنا
يا حظ دار الجزيره يا غناويها

العدل والعطف والرحمه ووقفاتك
ما فيه أحد ما دعى لك يا ملك فيها

والعز منك وفيك وبك ترى حاضر
كل المجالات تفخر يا معاليها

وأنا عليك المعاني لو بوصفها
تعجز جميع المعاني في معانيها

وتشيب منك القوافي دون ما تاصف
مواقفك يا سليل المجد ما أحصيها

قيادتك بأمر شرع الله مناهجها
دستورك المصحف وسنته محييها

والناس ثارت على حكامها ثوره
وحنا نثور بغلاتك لا تحاتيها

لك مننا بالوفا لو طالت الدنيا
ما نخذل الدين والرايه نعليها

وتحت ولاية حكم عبدالله الوالد
اللي صورّه ندورها ونشريها

إنا مع نظرتك قدام ما نرجع
وأعداك يا سيدي تامر وننهيها

وإنا على أمر الطلب بأمرك توجهنا
لو وشوشت بيننا الأعدا ما نوحيها

وإنا بنهضة تطور وقتنا الحالي
ندين لك يا يا مدبرها وقاضيها

وندين لك فالمكارم كرّمك ربي
واعطاك من لذة الدنيا وما فيها

واللي مضى من حياتك خدمه لشعبك
ولأمتك ربي القادر يجازيها

ويسدد خطاك في ما جاد به جودك
ويوفقك دامت الدنيا وأهاليها

ويمد في عمرك بطاعته وبذكره
ويحفظ لنا الصوت والصوره وراعيها

والله لو إنهم على الشاشه يعرضونك
أبشرك كل خلق الله تحييها

هذا شموخ الملوك وهيبة القايد
اللي بتواضعه لم أقصى نواحيها

وخمد سياسات ناس همها الفتنه
أطفى مشاهيبها وألغى هقاويها

محبتك خلت المجنون بك يصحى
وأصحى البشر بالمحبه من يجاريها

يالله لا تحرم حروفي لا تاصلك
ترى الهدايا على مقدار مهديها

غلاتك اكبر من الشعر ومن حروفه
ومحبتك والله إنا ما نحابيها

ومقامك أسمى من اللي ينكت لجلك
لكن تقبل حروفي اللي منقيها